日本石垣岛Blue Cabin胶囊酒店 ✈️🏢
日本石垣岛🏖🏞🏯，真系一个好抵玩嘅地方！

由香港坐廉航去，来回连税先$700 (未计行李费) 😬

今次想介绍嘅系当地好出名嘅胶囊酒店 Blue Cabin🏢，好多日本人推荐架；因为我系一个人去旅行，所以就胆粗粗试吓；结果真系无拣错，绝对系平靓正之选👍🏻👍🏻

由机场门口坐 4 或 10号巴士，大约25mins车程，就能直达酒店门口，酒店附近有巴士总站、出海码头、商店街、好多食肆、药妆、超市，位置非常方便！酒店近海，天台仲可以睇到日落，好靓 🌅

房价方面，淡季每晚大约$200-$250/人(包早餐) ；房间虽小，但卫生程度非常好，隔音亦都唔错，入住的客人大部分都非常自律，所以夜晚9pm后已经非常安静；床头有个细柜，可以锁起放贵重物品; 至于大型物件，可以选择放系Lobby HouseKeeping；

洗手间及冲凉房方面，虽然系共用设施，但都好干净卫生，定时有人清洁打扫，而且有好多格，所以都唔使点样排队；另外基本嘅冲凉冼头用品、毛巾及吹风机都有提供；而且仲有2间浴缸房可以浸浴，每人每次可以用45min，不过要一早book定，如果晏左就book唔到架啦！

早餐方面，系酒店G/F Blue Cafe度食，7:00am-10:00am，系自助形式，虽然选择唔多，但应该有的都有了，而且味道质素非常好，尤其佢哋嘅面包非常之松软，完全做到贵精不贵多，YummyYummy 😋😋 餐厅有Outdoor位置，可以望到海，每朝系度叹个靓早餐，心情都靓啲🥰🥰

下次大家如果想平平地玩返转石垣岛，真心推介呢间胶囊酒店😀😀

地址 : 石垣市美崎町2-6