虎豹别墅 上一代嘅集体回忆
🐅二三十年代，虎标驱风油嘅老板胡文虎先生，以当时嘅天文数字一千万港币（其实依家对我嚟讲都系）购入咗大坑半山一大片地皮，兴建虎豹别墅同好多上一辈嘅集体回忆--万金油花园。建筑时间经年，开幕时连港督都有出席，可见当时系一件非常大嘅盛事。回到二三十年代，当时未有荔园、海洋公园、当然未有迪士尼，万金油花园成为全港唯一嘅主题乐园，而且系免费开放。当中最令人难忘嘅系🌋十八层地狱嘅场景，当时吓亲唔少小朋友，目的都系导人向善。若干年前，胡氏后人将地皮出售畀长实，改建成豪宅名门，只保留被评为一级历史建筑嘅虎豹别墅，即当时胡家居住嘅大宅，该大宅从未向公众开放。

两三年前，政府将大宅使用权畀咗一个古典音乐团体，但要复修管理一个古建筑绝对唔容易，于是乐团将虎豹别墅归还返畀政府，政府古迹办23年6月开始正式向公众开放。但要留意，别墅只于星期五六日及公众假期向市民开放，市民必须预先上网预约导赏团，费用全免。分四个时段，每节导赏为90分钟，每节只限24位参观者，名额都几抢手，通常一个月前一开放报名名额就好快爆满。留意导赏以广东话进行，而且并没有提供翻译机。我参加星期五第一团，十点开始集合，参加导赏好多都系年长嘅朋友，有一位外籍人士，但有一半报咗名嘅市民都放飞机，实属一个唔系太好嘅现象。

虎豹别墅楼高四层，最顶层系拜神嘅地方，现在修复中，未有对公众开放。地面𠮶层系厨房、洗衣房等工人工作嘅地方，厨房上菜时只能透过妹仔梯未细小嘅出菜口，将𩠌菜递畀管家，主人同妹仔系完全唔会碰到面嘅。

一楼系大厅，两片圆形嘅意大利彩绘玻璃最吸睛，室内建筑中西合璧，尽显气派。饭厅当时可以放到两张大形圆形餐台，仲有一个小偏听、调酒嘅房间、壁炉，壁炉上有一片大镜，由艺人吴耀汉父亲、九巴创办人之一吴海霖所赠。一楼仲有一个游戏室，当时用嚟展出屋主嘅收藏品。

二楼系各成员嘅房间，设计比一楼简朴，亦都系电影毒舌大状嘅拍摄场景之一。