第三次广州自驾云南（随机入藏出川版）-德钦游记攻略【携程攻略】

18、19两年春节三个礼拜既云南自驾之旅系好好既回忆，其后受疫情同工作既影响，三年都冇自驾去“酒同远方”喇，碟埋心水好好咁做多D功课，不断甘改进行程，好多次都十分期盼可以出发。

个仔17岁喇，唔系好中意跟我两公婆咁出去，好在佢最好小学同学蔡蔡一家（4人）都计划去云南自驾，沟通之下，竟然出发日期初定同我地一样添，而且好钟意我地既行程，两个小朋友就更开心喇。后嚟为左跟到我地既车程（大理次日达），佢地仲专登提早一日出发添。



准备工作：因为经已好熟悉，仲要系夏天去，行李就更加简单喇，不过仲系带多左一箱衫（主要系贪靓，各种场景都带衫，其实去到就赖得换，强烈建议再带少D）。出发前一日去换埋机油、带瓦斯炉、公仔面、白酒洋酒各两斤。



18、19年春同23年夏既行李、睇到系越嚟越少既

8月4号（礼拜五），工作行得开，中午一点出发，九点几入住百色温德姆度假酒店（推荐），出嚟宵左下夜就返去训觉喇。

5号，五点半出发（百色测速好严，好在个底好，超10%都冇处罚），两家人中午系昆明既服务区汇合，好开心，嗱嗱临影返张集体相先。四点几到左大理古城南门，呢边人少D，停车方便。即刻去整返个杂菌鸡煲，医下个肚先，开酒（有个女司机，可以餐餐饮返杯）！系咁意逛左下古城，天黑前入住洱海边既大理蓝舍海景客栈（服务差、不推荐）。



第一波狗粮



两公婆系洱海边浪漫左一下

6号，雨，两公婆客栈米线，跟住担遮逛洱海，新整好既步道为洱海增色左好多。云南呢边天黑得迟，加上行程安排得好，D细路基本可以日日训到自然醒，所以11点先出发去虎跳峡既香格里拉山美客栈，旅途正式开始。

落左高速，过松园桥，系西景线路边既幺妹鲜鱼馆食晏（条鱼小贵）。到虎跳峡大桥（腾讯地图，高德冇显示桥名）果阵，被告知景区因近段时间雨水多水量大封闭左，唔俾过桥（跟住上网搜下，原嚟10点半就封左，怪唔得唔塞车啦）。我地继续向前开，过桥头中桥（腾讯地图）后停落嚟打电话俾客栈老板娘，佢话可以入去。前后经过三道保安，话系去山美或者直接同客栈通话后都放行，连景区门票都冇得收我地既（两次嚟都冇入景区，不过19年果次就正常情况下路过都要俾钱）。

客栈前边有一段长2.4公里、落差350米（不同软件结果有差异）既十几个劲斜S弯，水泥铺装。好在部车争气，抓得得心应手，一D都唔挫，一手过弯，直头似游乐场D节目（副驾一直留意上面来车），好吸引。客栈有自己的停车场，可以停六七部车。



山美客栈前的“游乐项目”

住落，趁雨细，按计划逆行高路线路约1公里，到达“冰粉”处就返转头，当做热身。雨后既玉龙、哈巴，烟雾缭绕，另有一番美态，全队人既兴致都开始上晒嚟并KEEP住系10几日既旅程度。



对面依次就系丫叉角庄园、茶马客栈同山美客栈

落雨、泥泞、水大，小心

狗粮买一送一

飘来榴莲之香

山美出品

老婆出品

楼主出品

选择山美，就系为左徒步，条件有限，唔会过高要求。晚饭、早餐都系客栈，热水充足。头天半夜，线路问题全村停电，第日天黑前修好，影响唔大，好彩我地有带瓦斯炉同足够既充电宝。

7号，11点开始高路徒步，天气很配合，云、20度左右。半路，一群牛挡住左去路，两只牛公仲争宠开片添。甘既情况，咩攻略都未见过，大家都冇晒计，系度斋等。好在牛主人够晒经验，睇到我地行过甘耐都冇系前面既山坳浦头，就主动过嚟解围嘞。



呢杯茶，问你点顶



观音瀑（唔咁肯定系呢个名，有冇驴友有肯定既答案）



大约一点钟到左HALF WAY食饭（唔贵、味道麻麻）、系“爽死你阳台”摆拍、“帮衬”天下第一厕。继续出发，阳光之下，沿路景色非常漂亮、色彩丰富。到观音瀑（畀相老板娘睇，佢话叫观音瀑。瀑布之前既果段路最窄，系最危险既）既时候，因为水大，冲住左条小路，加上瀑布前既碎石坡都好危险（应该有小小塌方），我地就返转头嘞。返到中途客栈，系阳台酒吧饮下啤酒、咖啡。果度间士多会提供租车师傅既电话，叫左两台车（150一台）送我们返山美。呢段徒步实际唔够10公里，基本系平路，唔会太难，带樽水就可以行得果种。



客栈既晚饭做得好好，唔贵，大家相处真诚融洽，非常感谢客栈。呢间客栈其实都有景观好好既阳台，不过冇网红化遮。



山美招牌黄闷鸡，正！

8号，早餐后，出发张老师客栈，徒步其峡谷线路（15一位。有三条线路可以落谷底，另外两条是“天梯线路”和“一线天线路”），在谷底江中大石拍照，封景区的水量非常汹涌，来得真是时候，无人机派晒用场。



张老师线路谷底大石，十几日后，呢条石粉路都畀冲走晒。

谷底有一小吊桥与“天梯线路”相通，过去要另外收钱。告知果边我地剩系过去佢地既吊桥就原路返回，所以只收五蚊位，过其吊桥去江中大石再收10元（19年春节过过一次，水量冇今次大，极力推荐，果年个仔仲未敢行，今次就唔同喇）。回程，爬168级勇士云梯上嚟（10元位，天梯既老板娘竟然系琴日系中途接我们返山美既司机），天梯好斜，，加上后段体力差，D后生仔留前斗后，经已唔见晒人影喇，好在两公婆互相鼓励、慢慢爬，一样上到嚟。呢段谷底徒步成个行程约5个钟（含大量影相时间），水平距离小，不过就落差好大，已经接近自己体能既极限。

两条线路分界既吊桥

“天梯线路”谷底吊桥（2019年）

“天梯线路”谷底吊桥（2023年）

“天梯线路”既天梯（2019年）

“张老师线路”天梯

高路、峡谷徒步线路图（系张老师客栈影既）

差唔多五点返到张老师客栈“午餐”，跟往就出发哈巴村，特登去左以前可以过渡到大具乡既下虎跳峡，而家起左新既“金沙江桥”，我地开到对岸，无人机开始路拍，好似以为自己系318甘（后嚟我地真系去左啊！），跟住再专登兜返嚟下虎跳隧道去客栈。东环线系疫情几年已经改造好晒，好好开，天黑前就赶到左“香格里拉哈巴半山客栈”（推荐）。准备第四站的哈巴露营。



从张老师客栈过嚟，唔入隧道、靠右行，6公里就到金沙江桥过大具乡



青春无敌



哈巴路上，东环线既彩虹

呢间客栈主要由老板娘打理，洛桑大哥分管梵尘德拉野奢营地。老板娘提前同我沟通，约好晚饭人数同时间，我地一到客栈就可以上餸喇，色香味都有，见我带酒，佢仲请我试下佢闺蜜好中意既当地酒添。客栈既庭院好大，晚黑闻住好香既焖牛腩（第朝早餐），听歌叹茶，睇老板娘好认真甘同听日爬哈巴雪山的客人上课。



9号，上午，终于见到好忙既洛桑大哥，同佢了解营地既情况，觉得好好，决定中午入住。从客栈开去营地要9.5公里，系好窄既盘上路，最后一大段仲系碎石路添，要慢慢开，用左九个字先到营地。营地系半山，高山草甸地貌，靓到痹。入住后，营地有个毅毅小朋友同我地好啱KEY，主动带我地采牛肝菌，有“专家”带住，俾我地揾到拳头甘大既。第一次，大家都做晒“小姑娘”喇。大哥讲系火把节，营地劏羊，羊肉煲，正。晚上营地安排篝火同烟花，大家又兴奋左一轮，两个小朋友更加系大SHOW电子产品技能。如果早D就入住，就够时间骑马去埋高山牧场同湖泊。



我地采既牛肝菌



两个小朋友既创意相，古下系点影既？



拳头甘大既牛肝菌

10号，半夜落雨，落到朝早先停，之后云雾散去，成个营地好似仙境甘，值回票价，仲见到哈巴雪山既顶峰添。



10点出发，行东环线，半路见天气晴朗，就顺路加游埋白水台，然后去普达措国家公园。就到香格里拉果阵，叫个仔上网搜下，推左呢间系古城旁边既“雪域藏家火锅”，打边炉，强烈推荐牦牛火锅同藏香猪肉。



白水台



普达措属都湖



饭后入住“香格里拉祥白藏艺别院”。18年第一次自驾，住系古城，今次专登拣住松赞林寺景区，住店门票有优惠，62蚊位（凭票进松赞林寺），可以多日进出。客栈由老板两公婆打理，人好实诚，两个女放假都系度帮手，如果想系佢地度晚饭，记得预约。客栈就系松赞林寺对面，庭院可以停车，房间够大，装修好好，推荐。



11号，又去雪域藏家食晏，酸辣猪脚锅都好唔错。再次游览独克宗，五年前嚟果次，系“无尘”买左套好钟意既茶具，返嚟冇耐就畀“某人”打烂左个茶壶，今次系刻意嚟寻觅既。佢地既铺面换左地方，好在我地幸运甘偶入左佢既新店，老婆认出左老板娘（虽然佢两公婆珠圆玉润左好多好多），佢做左妈咪，变化好大，冇晒以前果种“你中意买未买啰”既“豪气”，我仲专登叫埋个仔入嚟，两家人相见，好有感慨，大家倾左个几钟头先拣嘢埋单。除配返个壶外（梗系某人买单嘎啦），仲拣多个家姐好中意既添，送返去俾佢做生日礼物。逛完古城，就车游左下纳帕海，食埋饭就返客栈喇。



寻觅“无尘”（老板娘两姊妹而家系古城开左两间“无尘”）



个仔18年、23年既变化



上边系新配既壶、右下系原先既，虽然唔系衬得好紧要，不过甘都揾得返店家既过程先至系乐趣



搭“蔡蔡”地送返去畀家姐，2000公里“快递”，啱好赶得切生日



完左五年前既心愿，请“蔡蔡”嚟“小菜咖啡”饮咖啡

12号，上午两公婆行左下松赞林寺，食完晏就出发“德钦碎片吾乡梅里雪山公馆”。雨、多弯，路遇两单炒车，真系要慢小小开。路过金沙江“奥咪嘎”大弯，停落嚟去影相。而家吾收费喇，不过吾一定系好事，卫生间根本唔敢入去。



雨观金沙江“奥咪嘎”大弯

提前同店家约定好菜单，捱晚到后冇耐就可以开饭了，出品ok。公馆装修有品位，设施豪华，价格小贵，左右两边都有小高层的酒店起紧，到时希望房价可以平D。雨雾，睇唔到金山。



因为临时工作需要，“蔡蔡”一家要缩短一日行程，第二日就返转头去泸沽湖嘞，我地就此告别。



两家人就系公馆门口挥手讲再见嘞（我不忍看你，背向我转面。。。。）

13号，按原计划，第二日系去千年盐井后就正式原路回程住飞来寺一晚既。十点，我地一家先行出发，无耐就变到好好天，车度放住个仔D劲歌，开系去尼农峡谷既路上（没有选择飞来寺方向，想去睇尼农峡谷既滑索同雨崩既出入口），D感觉凸然间上晒嚟。细恁左下，今日先至系星期日，仲有成个礼拜，点解唔去埋318遮？！一讲出嚟，老婆同仔都赞成，停落嚟睇睇个导航，一路畅通，即刻就甘愉快地决定啦（错过了8月14日的日照金山），果种可以甘突然改变既感觉好得人钟意。

开左半个钟，就过左尼农桥，见到废弃左既尼农吊桥同滑索，我系地图度留意左呢度好耐，今次系专登过嚟，冇失望，好壮观，再往前唔远，就系去雨崩既路口。



晚黑玩手机果阵，都会留意“某音”当地既视频，可以揾到好多有用既资讯。琴晚就经已睇到G214古水段发生泥石流，话当晚可以抢修完。我地今日中午经过果阵单边放行，塞左唔够半个钟度，算好好彩勒。一点半进入芒康地界入藏！再往前就系西藏昌都公安检查站，刷身份证就OK。



两点到比较出名既“盐井正宗一口面”，30一位，任食，墙上写住既记录系147碗，服务员唱住歌跳住舞，搏命甘同你“加一个、加一个”，加一碗就自己系台面个篱度攞粒石仔记数，D面好普通，不过食既过程就十分愉悦，推荐。



跟住去睇埋西藏盐井天主教堂同千年盐井，就出发去芒康，6点到，到左先拣酒店，呢间“芒康柏晶酒店”系主路边，睇过先入住，250晚，干净企理，楼下大院可以停车，系对面小店炒几个餸就返酒店训觉勒。



14号，6点半出发，经过呢个系地图睇过好多次路口，停落嚟望下，觉得总会有机会系度向左转既（入藏）。



今次转住右先

游览措普沟景区，好惊喜，强烈推荐。原来系可以自驾入去既，不过要提前一天系景区小程序预约。我地唔知道，所以系携程订左票，游客中心大巴，好少游客，坐13公里先到达景区入边，整紧路，要开半个钟。天气好正，章德草原系后面既扎金甲博神山映衬下，色彩艳丽、好壮观，顿时觉得无拣错地方，加上果度仲栋住个318路牌，好够FEEL。大巴剩系去到措普湖，跟住可以选择坐电瓶去到最上面既措普寺，跟住顺住行返落黎睇两个细湖同措普湖，完全超越普达措、挥得住九寨。



四点两出发理塘，原路景色靓到痹，途观姊妹湖，入住理塘千户藏寨酒店，就在大路边，门口可以停车，外卖螺蛳粉晚饭。天空之城，梗要少少高反先对得住既，剩系得我一个人头疼，酒店有制氧机，吸住训，第朝就无事勒。



姊妹湖



15号，7点出发，系天路18弯度，因为多车停系路边，加上有人逆行，塞左半个钟，其余路段一路畅通。经过康定机场，岩好见到飞机降落。折多山好多人、好大雾，没有停留。差唔多三点到康定情歌广场，江边马路无得停车，开去入边果排就有位。影张相、食个火锅就出发都江堰，八点入住百伦国际酒店（住两晚、推荐），楼下商场晚饭。



天路18弯



康定机场



折多山

16号，终于可以叹返个靓早勒，酒店出品OK，两公婆撑左两个钟台脚。跟住去酒店泳池，唔知系唔系系高原返落黎会劲D，游到都唔知攰。成点钟先出去揾野食，专登去琴晚经过见到好多食肆既都江堰大道三段，拣左呢间“扶摇”，火锅冇得顶，超正。跟住去逛埋仰天窝广场同都江堰景区。



仰天窝广场



17号，今日陪老婆同个仔去睇熊猫（熊猫，N年前都经已唔会去睇嘎啦），而家竟然又网红返，隔晚订都剩系得雁昼场，啱晒，又可以食返个两个钟既早餐。11点出发去成都大熊猫繁育研究基地，拣左系西门入，人少车少。里面好大，一定要坐电瓶。逛左两个半钟，出发去成都，入住香格里拉酒店。住落先知听日轮到我尾号限行，三仔乸趁机续住多晚。

